BANDA

Lekitto Musika Bandako partaideak:

• FLAUTA- Nere Txakartegi, Paula Ugarteburu, Arai Arantzamendi
• OBOE- Aroa Intxausti, Nadir
• KLARINETEA- Izaro Isidro, Gaizka Bereziartua, Naia Akarregi, Karlota Piedra, Naia, Laida Sesma, Maddi
  
• SAXO ALTOA-  Asier Cabrejas, Iraia Lejardi, Duna, 
• SAXO TENOREA- Ibone Ibazeta, Ekain Txakartegi
• SAXO BARITONO-  Itsaso Sesma
• TRONPETA- Aimar Beato, Naia Aranzeta, Jokin Gabiola, Gorka 
• FLISKORNOA- Xabi Gabiola
• TRONBOIA- Mikel Gabiola, Iker Figeroa, Ane Kozkorrotza, Amaia Ansorregi, Iraia
• BONBARDINOA- Joana Mestraitua
• TUBA- Erik Garagarza
• KONTRABAJUA-
• PERKUSIOA- 2ttor Txakartegi, Aiala Beato, Beñat Belaustegi, Josu, Suna, Kea

ZUZENDARIA : Urtzi Iriondo

Lekeitioko Musika Banda: Historia laburra

Musika Banda da Lekeitioko kultur talderik zaharrena, nahiz eta bere kideak oso gazteak izan. Kimu berriz jantzitako zuhaitz zahar baten antzekoa da. Lehengo adarretatik jaiotzen dira kimu berriak: hasieran, bigun;  gero, hostoz jantzitako adar sendo; lorez josita, udaberrian; fruituz beteta, udan, gizakien espiritua elikatzen duten fruituz, gainera.

Hostoz biluzten hasten da udazkenean:  atseden gose, biluzik geratzeko neguan, baina ez hilda, hurrengo urteko loraldirako prestatzen baizik.

Barruko hodietatik etengabe dabilen likido elikagarria (zuhaitzaren izerdia) da zuzendaria;  berau barik ez dago ez hostorik, ez lorerik, ez fruiturik.

Enborraren eraztunak zenbatzean jakiten da zuhaitzaren adina: zenbat eraztun, horrenbeste urte.

Lekeitioko Musika Bandaren enborraren eraztunak zenbatzen ibili gara eta ehunetik gora zenbatu ditugu.

1900ean Casimiro Etxeberriak  zuzentzen zuen La Independiente izeneko musika banda  bihurtu zen   Lekeitioko Musika Banda, Udalak deitutako lehiaketa irabazita. Zereginak: domeka eta jai egunetan bailableak jotzea herriko plazan; herriko jaietan kalejirak egitea; prozesioetan jotzea eta, agintariren bat zetorrenean herrira (gobernadorea, diputatuak…), serenatak jotzea.

Eskainitako soldata (5000 erreal) ez zela nahikoa egiten zuten lanerako eta,  1902an, musikariek utzi egin zuten Banda.

1900etik 1902ra bitartean izan zen bandako zuzendari Casimiro Etxeberria, eta berak idatzitako obra asko  Estudiantinak jotzen ditu gaur egun; izan ere, Casimiroren La Independiente musika bandan erne zen  Estudiantina.

Banda barik geratu zenean, Udalak hauxe erabaki zuen:  Musika Bandako zuzendari plaza oposiziora ateratzea, eta Musika Eskola bat sortzea,  musikariz hornitzeko Musika Banda. Musika Eskolako zuzendaria Bandako zuzendaria izango zen.

Bederatzi pertsona aurkeztu ziren azterketara, eta Vianako Agapito Hernández-ek atera zuen postua.

1902tik 1906ra izan zen Agapito Hernández Musika Bandako zuzendaria.

1906an, arrazoi pertsonalengatik utzi zuen Banda Agapitok, eta Udalak berriro zabaldu  zuen oposiziorako deialdia. Hamabi pertsonak eman zuten izena, eta Miguel Oñatek irabazi zuen; bigarren,  Feliciano Beobide.

1907tik 1914ra izan zen Miguel Oñate Bandako zuzendaria. 1914an, Udalak kargutik kendu zuen Oñate eta azterketan bigarren geratutakoari  eskaini  postua; honek onartu egin zuen.

1915etik 1921era bitartean izan zen Feliciano Beobide Bandako zuzendari. Entzute handiko zuzendaria izan zen, eta berak idatzitako hainbat obra gaur ere kantatzen dira.

Beobide Euskal Ikaskuntzara joan zen Euskal Musika Editorialean lan egitera, eta Musika Banda utzi behar izan zuen.

1921eko martxoaren 17an zuzendari plaza oposiziora atera zuen Udalak: oinarrietan herriko seme izatea eta euskara jakitea baloratu egingo zirela adierazten zen.

Alfonso Larreta izan zen irabazlea, eta 1921eko apirilaren 20an udalak Alfonso Larreta izendatu zuen zuzendari.

 1921etik 1936ra arte Alfonso Larreta izan zen Musika Bandako zuzendaria.

Hogeita hamaseiko gerraren ostean, zuhaitzaren eraztunak oso beltz ageri ziren: ez zen Bandarik izan Lekeition; jaietan, banda militarrak ekartzen zituzten, kontzertuak jotzeko.

1944an Francisco Garcíak hartu zuen zuzendari postua eta musika banda berregin.

1944tik 1957ra bitartean Francisco García izan zen bandako zuzendaria.

1957an Zuzendarien Gorputzeko Armando Montañak eskuratu zuen bandako zuzendari postua.

1957etik 1961era izan zen  Armando Montaña bandako zuzendari.

1961ean hil zen Armando Montaña, eta lehengo zuzendaria jarri zen, berriro, banda zuzentzen.

1961etik 1962ra Francisco García izango da bigarrenez arduradun, baina ordurako zahartuta eta nekatuta zegoenez, zuzendari berri baten bila hasi ziren, eta Miguel Arrieta  aurkitu zuten Mutrikun.

1962tik 1967ra izan zen Miguel Arrieta bandako zuzendaria. Aipatzekoak, bi gauza:  batetik, musika ikastera hurbiltzen ziren ikasleei ematen zien tratu duina  —eskoletan ematen zen tratu ankerraren aldean, guztiz bestelakoa— ; eta, bestetik, garai hartan, herriko plaza jendez bete egiten zela bandaren bailableekin dantzan egitera.

1967an Zuzendarien Gorputzeko Rafael Rosell-ek hartu zuen zuzendari postua.

1967tik 1975era izan zen  Rafael Rosell Bandako zuzendari. Garai hartan hasi zen bailableen gainbehera, dantzalekuak ugaritzen hasi ziren eta. Kanta modernoak moldatu zituen bandarako eta euskal kutsua zeukatenak ordeztu: “Anteron Txamarrotia”, adibidez, “Ha Terminado”-rekin ordeztu zuen, jendeak “Anteron txamarrotia, Franco-ren bibotia” abesten zuelako. Egun esanguratsuetan kontzertuak jotzen ere hasi zen.

 Rafaelek alde zuenean, Miguelek hartu zuen, berriro, zuzendari postua.

1975etik 2005era Miguel Arrieta izango da bigarrenez bandako zuzendaria. Euskal musikagintza suspertzeko xedez, euskal kantautoreen abestiak eta abesti herrikoiak bandarako moldatzen lan handia egin zuen, baita kanta berriak asmatzen ere. Bailableak eta kontzertuak uztartu zituen Musika Bandak garai hartan.

Lekitto Musika Banda gaur egun

2006an Urtzi Iriondok hartu zuen zuzendaritza. “Musikarekin disfrutatu eta disfrutatu eragin” da bere leloa, eta hori errealitate bihurtzen ahalegintzen da bandako musikariekin.

Udako bailableak eta sasoi desberdinetako kontzertuak uztartzen ditu urtero. San Antolinetan, Santa Zezilia egunean, Gabonetan, ihauterietan eta udaberrian jotzen dituzten kontzertuez gain, emanaldirik bereziena eta arrakastatsuena uztaileko kontzertua izaten da. Estilo desberdinak uztartzen dira bertan: BERTSO-BAND 2010ean (Banda, Jon Maia eta Amets Arzellus bertsolariekin); TTAKUN BAND 2011n (Banda eta OREKA TX taldea); DELIRIUM T BAND, 2012an (Banda, Andoni DELIRIUMekoarekin). 2013ko uztailaren 19, DANTZABAND, Andoni Aresti eta Maria Martinen taldeekin edo Edu Muruamendiaraz, Asier Uskola eta Eneko Alcaraz dantzariekin. Azkena, EUSKAL KANTA BAND 2014ean Miren Narbaiza abeslariarekin.

Abuztuko “Gau magikoan”, Bandarekin batera, Gorka Benitez, Alejandro Mingot, Teresa Zabalza, Aritz Luzuriaga, Hasier Oleaga, Nirankar, Oreka TX edo Andoni Basterretxearen (Delirium) mailako musikariek edota Jon Maia bertsolariak parte hartu izan dute. Kontzertu honekin, rock, blues edo jazz doinuez disfrutatzeko aukera izaten du herriak.

Kimu berri hauekin guztiekin eztituta aberastu egin da  Musika Bandaren zuhaitza, baina benetako aberastasuna urte guztian egiten duen lanean dago.

Musika Bandaren fruituekin elikatzen da Lekeitioko herria, eta herriak dion maitasunarekin elikatzen da Lekitto Musika Banda.